"اينديكي عاغيليميز اولسايدي"-بونو هئچ دوشونموشوكمو؟!
اينديكي عاغيليم اولسايدي، مثلا بو ياشيمدا صاحب اولدوغوم معلوماتلارلا 18-20 ياشيما دؤنه بيلسيديم دئينلريميز نه چوخدور. اينديكي عاغيليم اولسايدي، دونياني بارماغيمين اوجوندا چئويررديم، دئيه دوشوننلريميز، بو آندا بيلديكلريمله نهلر ائدرديم دئيه دريندن آه چكنلريميز، هئييفلنهرك “اه او ايللر” دئيه دوشوننلريميز…حقيقتن ده نئجه ده گؤزل اولاردي، كئچميشه معلوماتلا بضاميش اولاراق دؤنسك. موس دئمهدن مصطفييي باشا دوشسك. كئچميشده ائده بيلمهدييلريميز اوچون پئشمانليق حيسسي كئچيرديگيميز نه وارسا اونلارين شعوروندا اولاراق او ايللره دؤنسك و اسكيكلريميزي تاماملاساق.
بضا ده كئچميشه قارشي حيسس ائتديگيميز حسرت او قدر آغيرليق تشكيل ائدر كي، بير آن زامان دايانسا و او ايللره دؤنمك ايستهيريك. بوتون سئوديكلريميز يئنه بير يئرده اولسا، اؤلموش ياخينلاريميزين اولكي وضعيتلري، او دادينا دويماديغيميز گونلر قوللاريني بيزه آچسا. بير آدديم آتساق و هله ده حسرتيني چكديگيميز گئري دؤنمهسي مومكونسوز اولان گونلريميزه دؤنسك.
اصلينده ان چوخ حسرتينده اولدوغوموز ايللر ده ائله اوشاقليق ايللريميزدير.چوخ پيس ايللر كئچيرميش اولساق بئله داريخاريق يئنه ده. داريخديغيميز شئي، ياشاديغيميز منفيليكلر، يوخسوللوغوموز دئييل. اوشاق اولماغين معصوميتي،ائتمك ايستهييب لاكين ائده بيلمهديكلريميزدير. يا دا آناميزين بيشيرديگي كئكسين قوخوسو، آتاميزين يوكسك سسي، قارداشيميزلا دالاشماغيميزين ايلنجهسيدير.
او ايللرده بيزيم اوچون معناسي اولمايان نه وارسا،ايللر كئچديكجه و ياشيميز آرتديقجا معنا و ديَر كسب ائدير. هر دفعه اوشاقليق ايللريندن صؤحبت آچيلاندا دانيشيقلار، بورنوموزون اوجونو سيزيلدادان حادثهلر هفيف گولومسهمهلرله بير دفعه ده ياد ائديلر.
هر آنيني ‘اينديكي عاغيليم اولسايدي' جوملهسي بو گونه باغلايار يا دا ‘كاش كي' دئيريك. ' كاش كي، آنام،آتام ياشاسايدي، كاش كي او سؤزو دئمسيديم، كاش كي مكتبيمي بيتيرسيديم، كاش كي اونونلا ائولنسيديم (يا ائولنمسيديم)، كاش كي بيلسيديم، كاش كي، كاش كي، كاش كي…..
هميشه قلبيميزين بير قيراغيندا كئچميشه صفر ائتمهيين، كئچميشده قالميش گونلره گئري دؤنمهيين حسرتي و خيالي وار. اينديكي عاغيليم اولسايدي، آه بو بيلديكلريمله او ايللره گئري قاييتسايديم….
اما گؤرهسن او ايللره دؤنمك حقيقتن ده گؤزلهديگيميز و اوميد ائتديگيميز قدر گؤزل اولارديمي؟ خوشبخت اولارديقمي بو گونه قدر الده ائتديكلريميزله، اؤيرنديكلريميزله او ايللرين قاپيسيني دؤيمهيه؟ ‘ او زامان باخاق، ائي ناشيليقلاريم، ائي سهولريم، ائي حيات منه كؤهنه اويونلاريني اوينا گؤرك ايندي نئجه اويناييرسان؟' دئمك اصلينده هميشه اولماسيني گؤزلهديگيميز شئيلرديرمي؟ هئچ دوشوندونوزمو؟
تسووور ائدك كي 30 ياشيميز وار، يا دا 40 ياشيميزا نرديوان سؤيكميشيك. ان چوخ داريخديغيميز دا مكتب دؤورونه عايد گؤزل يولداشليقلار، چكيلن كوپيالايار(شپارقالكالار)، درسدن قاچمالاردير. او زامانلار او قدر جاوانيق كي، عاغيليميزدا هئچ بير پيس نيت يوخدور، يالنيز يولداشلاريميزلا خوش واخت كئچيرميي دوشونوروك.
و بيردن آرادان كئچن بو قدر ايلده الده ائتديگيميز بوتون تجروبهلر، هميشه آرزو ائتديگيميز او ايللره و او ياشا دؤنوروك. سورپريزه باخين، بدن ياشيميز 15-17 اما روح ياشيميز، حيات ياشيميز 35-40. بو قدر تجروبه ايله بيرليكده او ايللره دؤنمهيين نسه بير ماراغي وارمي؟ صينيف يولداشيميزين بيزه باخيشينين آردينداكي مقصدي آرتيق بيلميش اولاجاغيق. جيبيميزده بير كولا پولو يا اولار يا اولماز، يان صينيفدهكي يولداشيميز دا بيزه باخيرمي دئيه دوشوندويوموز زامانلا، قيرخ ايلين ياشانانلاري آراسيندا داغلار قدر فرق وار.باخ او فرق حياتيميزدا اصلينده بيزي چوخ شئيين فرقينه وارديرار. و امين اولون هئچ ده جذبئديجي دئييل ايللر اوله گئري دؤنمك.
خاطيرهلره حياتينيزدا هر واخت يئر تاپا بيلرسينيز،اما، گئري دؤندويونوزده ياشانميش ايللر هئچ واخت اؤز يئريني تاپا بيلمز. ايندي يئنه ده دوشونمهيه داوام ائدك. دوشونك كي، او چوخ ايستهديگينيز ايللره گئري قاييتديق. ياخشي، بس مين بير چتينليكله قازانديغينيز و بو ياشا گتيرمك اوچون عومورونوزو وئرديگينيز بالالارينيز نه اولاجاق؟ سيز اولكي ايللره گئري دؤنركن اونلار حياتينيزدا اولماياجاق. ائوليليك گونونوز ده اولماياجاق، مكتبي بيتيرديگينيز گونده ده. بيلميرم چوخ سئويملي گؤرونورمو؟!اما بوتون او يوروجو، بئزديريجي واختلاري يئنيدن ياشاياجاقسينيز و نتيجهده نه الده ائدهجهيينيزي بيلهرك مشغول اولاجاقسينيز. اوستهليك ده او قدر يئتكين، او قدر بيلميش اولاجاقسينيز كي، ياشيدلارينيزين دانيشديقلاري سيزه گولونج گلهجك. اونلارين چوخ صاف اولدوقلاريني دوشونهجك و بلكه ده اؤزونوزه چوخ حيرصلنهجكسينيز؛ ' من نئجه بو قدر آخماق اولا بيلديم، بو سهولري نئجه ائده بيلديم؟' دئيهجكسينيز. ياشيدلارينيزين سيزي خاريجلهديكلريني گؤرهجكسينيز و كئچميشده ائتديگينيز صؤحبتلر سيزه اولكي حززي وئرمهيهجك. حتي سيخيلاجاقسينيز، بدبخت اولاجاقسينيز.
باخ اينديكي دؤورده ده بعضي اوشاقلارين ياشيدلاري آراسيندا خاريجلنمهسينين سببي ده بودور. او اوشاقلارين فرقينده اولما و نَييسه دركئتمه سويهلري او قدر يوكسكدير كي، ديگر اوشاقلارلا آرالاريندا هميشه اونسيت پروبلئملري اولور. هميشه آيدينولونماز اولان دا ائله اونلاردير. چونكي چوخلاريندان فرقليديرلر، حادثهلره فرقلي مؤوقئلردن ياناشارلار. اونلار دا داهي، اوستون، عاغيللي دئديگيميز اوشاقلاردانديرلار.
باخ ائله بو زامان داهيليكله دليليگين آراسينداكي اينجه خطت گيرر دؤورهيه. ايشين ماراقلي ياني بو اينجه خطت بير نئچه آي بوندان اول ده علمي باخيمدان تسديقلندي.
ماجاريستانداكي سئممئلوئيس اونيوئرسيتئتينده، علم آداملارينين آپارديقلاري آراشديرمالارين نتيجهسينه گؤره، ياراديجي فردلرده، پسيكوزلاردا و دئپرئسسييادا دا تأثيرلي اولان ‘نئورئگولين 1' آدي وئريلن بير گئن تاپيلديغي تثبيت ائديلدي. بو گئن، بئينين اينكيشافيندا بيرباشا تأثيرليدير و بو گئنين فرقلي بير نؤع ايسه شيزوفرئنييا و مانيك دئپرئسسييا كيمي خستهليكلرله علاقهليدير. بو سببدن ياراديجي اولان فردلرده آپاريلان تئستلرده ‘نئورئگولين 1' آدلي بو گئنه صاحب اولدوقلاري و عيني زاماندا دا دئپرئسيف شخصيت خصوصيتلري داشيديقلاري موعيين اولونموشدور.
بوتون بو علمي معلوماتلار بير يانا قالسين، سيز كئچميشه اينديكي تجروبهنيزله دؤنمهيه جهد ائتديگينيز زامان، او زامانكي يولداشلارينيزين سيزي آرالارينا بوراخمامالارينين سببي البته كي يئني فرق ائديلن بو گئن اولماياجاق. سيزين هر شئيي بيلمهيينيز، هميشه دوغرو اولان تخمينلرينيز، هله گئرچكلشمهدن بعضي شئيلري ان اينجه دئتالينا قدر تسووور ائده بيلهجك يؤنونوز هر كسي ناراحات ائدهجك. حتي عائلهنيز ده سيزين بو يؤنونوزدن ناراحات اولاجاق، چوخبيلميش اولاراق گؤرولهجكسينيز. خوشاگلمز بير دوروشونوز اولاجاق. اوستهليك دئيك كي دؤندونوز كئچميشه، بس بو گون چوخ سئوديگينيز، سيزين اوچون چوخ اهميتلي اولان اينسانلار نه اولاجاق؟ اونلاردان ايمتينا ائده بيلهجكسينيزمي؟ چونكي اصل حياتينيزي ميدانا گتيرن اينسانلار اونلاردير. سيز كئچميشده اونلاري تانيميردينيز و كؤهنهدن اونلاري تانيياجاغينيزي بيلميردينيز. اما بو گونكو عاغيلينيزلا، شعورونوزلا، معلوماتينيزلا كئچميشه دؤندويونوزده بيلميش اولاجاقسينيز. باخ ائله او بيلميش يؤنونوز هر كسي سيزدن، سيزي ده هر كسدن اوزاقلاشديراجاق. و ائله او آراداكي مسافهنين آدي تجروبهدير: سيزين حيات تجروبهنيزدير.
تجروبهلرينيزي ييغيشديريب بير كنارا قويا بيلمزسينيز، يوخموش كيمي داورانا بيلمزسينيز. چونكي بو گون سيزي سيز ائدن ده بوتون او ياشاميش اولدوغونوز حادثهلر و ايللردير. او تجروبه بو آنكي حياتينيزدا ايشه يارايير. كئچميشه دؤندويونوزده ايستيفاده ائده بيلمزسينيز. نه حيات سيزين اوميد ائتديگينيز حياتدير، نه ده سيز اولماغي گؤزلهديگينيز اينسانسينيز. او زامان ايندييه باخماق، بو آنين ديَريني بيلمك گؤزل اولار.
اينديكي عاغيلينيز اولسايدي، كئچميشده نه ائدردينيز سوالينا جاواب آختارماق يئرينه، اينديكي عاغيلينيزلا بو حياتينيز اوچون و بو گون نه ائده بيلرسينيز، پروبلئمينه وئرهجك بير جاواب تاپماليسينيز. جاوابينيز يوخدورسا دئمهلي هر شئي بوشدور.
من اؤز -اؤزومه هر گون، اينديكي عاغيليم اولسايدي نه اولاردي دئيه سوروشورام و ان چوخ دوننه گئديرم. بو پروبلئمين جاوابلاريني چوخالدا بيلديگيم قدر چوخالتماغا چاليشيرام. بو جاوابلار منه كئچميشده دئييل، ايندي لازيمدير. بير ده صاباحيما ايشيق توتماق اوچون جاوابلاريمين چوخ دقيق اولماسي لازيمدير. من دونندن بو گونه قازانديغيم، اوغرونا ايللريمي خرجلهديگيم هئچ بير شئيدن و هئچ كيمدن ايمتينا ائتمك ايستميرم.
اينديكي آغليم اولسايدي، بيليرم كي، بوتون سهولريمه و بوتون اسكيكلريمه باخماياراق من يئنه من اولارديم.
آرديني اوخو