جزالانديرماق يا دا جزالانديرماماق
بير چوخ موذاكيره ائديلن مؤوضولاردان بيري ده جزالانديرماق، يا دا جزالانديرماماق مؤوضوسودور. سيزجه هانسي دوغرودور؟
بير چوخ آنا و آتا جزالانديرماغي اوشاغين دوغرو اؤيرهديلمهسي اوچون قاچيلماز اولدوغونو مودافيه ائدير. حتي بعضي آنا و آتالار آچيقجا اوشاقلارين يالنيز جزالانديريلماقلا ساكيتلشديگيني سؤيلهييرلر و بونو شدّتله مودافيه ائديرلر.
اؤزونوزو دوشونون، اوشاقليق دؤورونوزده جزالانديريلديغينيز آنلاري خاتيرلاماغا چاليشين، نئجه بير دويغو ياشاييردينيز؟
جزالانديرماق چوخ واخت، كين، نيفرت و اينتيقام حيسّيني يارادير، آدامي داها دا عصبي اولماغا وادار ائدير و سونوندا دا آدامين اؤزونه اولان اعتبارينين ايتيرمهسينه سبب اولور؛ بو ايشين سونو بضا آدامين اؤزوندن بئله نيفرت ائتمهسينه و دونيايا چوخ منفي بير گؤزله باخماسينا گتيريب چيخارير.
جزالانديرماق پيسديرسه، بس نه ائتمك لازيمدير؟ دئيه سوروشورسونوزسا، سيزه بير سيياهي وئره بيلهرم. عامّا هر شئيدن اوّل بونو بيلمهليسينيز كي، سيز بير اينسان يئتيشديريرسينيز و بير اينسان يئتيشديرمك، بير بريليانت ايشلهمكدن چوخ داها چتين و صبر طلب ائدن بير ايشدير. بونو اونوتمايين كي، ايندي هر بير اوشاق اولان اوغول-اوشاغينيز بير گون قارشينيزا سيزين بويونوزدا بير اينسان اولاراق چيخاجاقلار؛ بوندان هئچ شوبههنيز اولماسين.عامّا اونلاري ايندي بير بريليانت كيمي صبر و دقتله بؤيورتسهنيز بير نئچه ايللر سونرا قارشينيزداكي اينسانلا سئوينه بيرسينيز محض بو منيم اؤولاديم دئيه بيلرسينيز.
بير آز صبيرلي اولسانيز، اصلينده دوغرو اوصوللارين داها آسان نتيجهلر وئرديگيني ده چوخ تئز فرق ائدهجكسينيز. سحو اوصوللارلا اوشاغينيزي دوغرويا ايستيقامتلنديرمك چوخ داها چتين نتيجهلر وئره بيلر، حالبوكي، دوغرو اوصوللاري ايلك باشدا بير آز صبر گؤسترهرك تطبيق ائتمك لازيمدي.چوخ داها آسان و قطعي نتيجهلر وئرديگيني قيسا بير زاماندا فرق ائدهجكسينيز.
جزالانديرماق يئرينه نهلر ائده بيلريك سوالينا گئري دؤنوب، بو اوصوللاري قيساجا سيياهي حاليندا سيرالاماق ايستهييرم.
1)دوغرونو اونا گؤسترين. .
2)اوشاغين صحويني اونا ايضاح ائدركن، اوشاغين شخصيّتيني هدف آلمايين.
3)اوندان ايستهديكلرينيزي آچيقجا سؤيلهيين و دويغولارينيزي ديله گتيرين.
4)صحولريني نئجه دوزلتمهسي لازيم اولدوغونو اونا ايضاح ائدين.
5)بونلارين هئچ بيري ايشه ياراماديسا، ايندي محدودلاشديرما گتيره بيلرسينيز.
6)ائتديگي صحولر نتيجهلريني ياشاماسينا قيسماً ايجازه وئرين.