2-3 ياشلي كؤرپهسي اولان آنالارا
اشيالاري گميرمهسي
عادتا كؤرپهلر 3-4 آيليق اولاندا ال بارماقلاريني،اويونجاقلاري،قيساسي،اللرينه كئچن هر شئيي آغيزلارينا آليرلار.بو عادتا شرطي رئفلئكسدن ايرهلي گلير. اگر سيزين ده 2-3 ياشيندا اولان اوشاغينيز بئله بير حركتلره يول وئريرسه،بو سيزي هئچ تعجبلنديرمهسين.اونلار اؤزلري ده بيلمهدن آغيزلارينا نسه گؤتورورلر.بونون،سيزين بيلمهديگينيز تك بير سببي وار-بو وضعيت اوشاقلاري راحتلاشديرير،روحن كؤرپهليك زامانلارينا قاييداراق اؤزلريني و فيكيرلريني توپلاماغا چاليشيرلار.اوشاغينيز چيركلي بير اشياني آغزينا آليب چئينهيركن،اونون باشيني قاتاراق چيركليني آليب،عوضينه تميز بير اشيا وئره بيلرسينيز.اويونجاقلاري ايله اويناياركن، اوشاغينيزي تعريفلهيين.مثلا: “اويونجاقلاري آغزينا آلماغين يووخ،اما اونلارلا اويناماغين چوخ خوشوما گلير جانيم بالاجام” دئيه بيلرسينيز.امين اولون،بو اونون چوخ خوشونا گلهجك.
يئمكدن ايمتينا ائتمهسي
2-3 ياشينداكي اوشاقلارين يئمكدن ايمتينا ائتمهسي هم نورمال،هم ده آرا-سيرا باش وئرن بير حالدير.اگر اوشاغينيز ستولون اوستونه قويولان بوشقابي ايتلهييرسه،بو بيشيرديگينيز يئميي بَينمهديگي معناسيني اصلا بيلديرمير.بو اصلينده اؤز دونياسيندا اؤز قرارلاريني گؤسترمك واسطهسيدير.يعني،من،بو آخشام كوفته يئمك ايستميرم.سيز بونا آنلاييش گؤسترهرك،اونا الده ائتمك ايستهديگي حاكميتي آز دا اولسا ياشاييب سئوينمهسينه ايمكان وئرمهليسينيز.داها ” بو اوشاقليغي ايله اؤز سؤزونو يئريتمهيهجك كي” دئييب، بير نؤو الينيزي ستولا وورماغينيزا گرك يوخدور.مثلا، اونا بوشقابيني و سالفئتيني سئچمهيه ايجازه وئرين.اگر اوشاغينيزا بئله بير سئچيم وئرسهنيز،يئمك زاماني داها آز نارازيليقلا قارشيلاشاجاقسينيز.آنجاق هئچ بير حالدا اونو مجبوري يئمك يئمهيه وادار ائتمهيين.نه ده يئمهديگي اوچون جزالانديرمايين.چونكي بو،آرانيزدا اولان وضعيتي گرگينكلشديرمكدن باشقا بير شئي دئييلدير. اوشاغينيزين بير گونده دئييل، بير هفتهده نه يئديگيني نظردن كئچيرين.اولا بيلر كي،بازار ائرتهسي و چرشنبه آخشامي آز يئسين،لاكين او بيري گونلر داها چوخ.
چيممك ايستهمهمهسي
سو ايله دولو واننادا اوتورماق بعضي اوشاقلار اوچون چوخ قورخولو اولا بيلر.بعضي اوشاقلارين ايسه چيممك چوخ خوشونا گلير.بضا سويون و حامامين ايستي و يا سويوق اولماسي اونلاري ناراحات ائدير.بئله ياشداكي اوشاقلارين چوخونون چيممكدن خوشلاري گلمير.چونكي بونون نه اوچون ائديلديگيني اونلار هئچ جور آنلايا بيلميرلر.اودور كي،اؤولادينيزا چيممك واختيني اولجهدن دئسهنيز،او اؤزونو بونا حاضرلايار.و بونو داها گؤزل شكيلده باشا سالين كي،اونون دا چيممهيه اولان هوسي آرتسين.حتي واننا اوتاغيني اويونجاقلارلا بزهمهنيز اونلارين چيممكدن خوشلانماسيندا آپاريجي رول اوينايا بيلر.